Rafael de Labra y l´autonomía cubana

Un periódicu de la isla ofrecía: "Por saca-y los güeyos, 100 pesos; por parti-y el corazón d'una puñalada, 500"

07.11.2013 | 01:42

Rafael de Labra y l´autonomía cubana

• Fotos de la noticia

Lluis Portal Rafael María de Labra Cadrana nació en L'Habana'l 12 de setiembre de 1841. Yera fíu de Ramón María, natural de Cangues d'Onís, y de Rafaela, natural de Xixón. So güelu maternu yera militar en Cuba y la familia marcha a la mayor de Les Antilles. Siendo ñeñu vien a Cádiz y Madrid, en cuya Universidá se llicencia en Filosofía y Lletres, y n'Uviéu de Derechu, siendo abogáu en 1860. Destaca pola so oratoria, y escribe "n'El Contemporáneo" y "La Discusión", y collabora na revista "Hispanoamericana", onde propón l'autonomía de Cuba.

Fue un gran activista de la Sociedá Abolicionista Española, fundada en 1865 por un grupu de peninsulares y antillanos, siendo presidente de la entidá ente 1868 y 1876; disolviose definitivamente en 1888 cuando se llogró erradicar la esclavitú n'España. Esta actitú clara que mantuvo en relación al abolicionismu tréxo-y grandes enemistaes en Cuba, inclusu un periódicu integrista abrió una soscripción pa premiar a quien llograse aniquilalu primero: "Por saca-y los güeyos, 100 pesos; por parti-y el corazón d'una puñalada, 500; por arrastralu, 1.000".

En 1871 fue escoyíu diputáu a Cortes por Infiestu, sin pertenecer a nengún partíu políticu, lo que-y permite actuar con gran independencia y llibertá, y consigue que s'apruebe nada menos que la llei d'abolición de la esclavitú por aclamación. En 1876 ye un de los fundadores de la Institución Llibre d'Enseñanza, de la que llega a ser reutor.

Labra defínese como republicanu independiente y, sobre tou, como autonomista, si bien darréu ingresó nel Partíu Centralista Republicanu, dirixíu por Salmerón.

Fue representante de Cuba nuna dómina difícil de tensiones y guerres. En 1871, cuando preparaba la so candidatura pa les nueves elecciones per Asturies, recibe la invitación de los reformistes portorriqueños qu'acepta deseguida. La carencia de representantes cubanos y la consideración de que les tesis portorriqueñes conveníen a la causa cubana emburriolu a presentase a les elecciones d'ultramar, siendo xefe de grupu nuna etapa hiperactiva.

Durante los próximos años el marxen de maniobra de los reformistes y lliberales ye escasu. Tres el tensu períodu de paz que trae'l Tratáu de Zanjón, cuyos acuerdos defende sin munchu ésitu Labra -lo que-y creó la enemistá con la mayoría conservadora cubana-, ingresa nel Partíu Autonomista, que col tiempu llamose Partíu Lliberal Autonomista.

Esti partíu plantea la idea autonomista como forma de resolver el conflictu en base a una modificación llegal que-y diese un ciertu autogobiernu al territoriu, y una serie de midíes aduaneres fundamentales que-y quitaría a España la supremacía nel comerciu cola isla.

Cuando n'España la guerra de 1895 a 1898 los autonomistes yeren verdaderos apestaos y les sos files menguaron enforma: unos incorporáronse a la nómina independentista, otros marcharon al exiliu... y dalgunos resistieron. A Rafael María de Labra vinieron-y delles de les mayores crítiques de los sos compatriotes asturianos, asina'l carlista Nicolás Rivero acusábalu de vender a España naquella dómina clave de Cuba, y Carlos Ciaño Canto, na so obra "Tipos y topos", ataca a Labra pola so postura sobre la esclavitú:

Labra, don Rafael María de

Le dieron los esclavos buen dinero,

y cuando el mundo entero

lanzó, lleno de enojo, el grito santo,

contra tanto baldón y escarnio tanto,

dijo alzando la cruz de la conquista:

"Soy abolicionista

porque es la libertad del hombre encanto.

¡Muera la esclavitud, viva el progreso!"

(Éste se comió el pan... y saca el queso).

Sin embargu, ente los españoles de la dómina Ciaño ve a una xente que ta a l'altura de los acontecimientos:

Arcos, don Ángel

Voluntarios: nuestra enseña

es noble, gloriosa, santa...

Si alguien el grito levanta

no andar con reparos, ¡leña!

A los autonomistes temíalos el "apóstol" de la revolución cubana, José Martí, y a ellos fueron bona parte de los esfuerzos. Resaltó Martí que los autonomistes qu'ingresaron nes llistes de la independencia, pero nun dixo nada de los miembros del Exércitu cubanu que se pasaron a la parte española: el brigada de Trinidá, Juan Masó Parra, los tenientes coroneles Benito Socorro y Rosendo García y los comandantes Victoriano Gómez, Marcelino Díaz y José Sánchez Agromonte y otros de menor graduación. Tamién volvieron exiliados cubanos en distintos países.

N'octubre de 1897 les autoridaes españolas piden al Partíu Autonomista que forme Gobiernu. Establezse rápidamente, siendo José María Gálvez el presidente, y la nueva Constitución autonómica aparez na "Gaceta" de L'Habana el 20 de diciembre. Labra nesi momentu representaba l'autonomía en Madrid.

En menos d'un añu foron munches les decisiones autonómiques averaes a los intereses cubanos, pero llegó tarde: en 1898 acabábase la guerra y los sos esfuerzos quedaron en nada. Rafael de Labra -que sería acusáu de ser un mal español- rechazaría una invitación de los cubanos pa dir a la isla d'esta manera:

"Por español fui autonomista; quixi evitar a la mio patria un gran dolor; tolos mios esfuerzos fueron inútiles (...). Yo nací español y español morreré".

En 1913 fue nomáu fíu adoptivu d'Uviéu, ciudá na que vivió -concretamente n'Abuli-, onde mandó construir una magnífica quinta d'indianos, tresformada un sieglu dempués en lluxosu restaurante que lleva'l so apellíu De Labra.

Morrió en Madrid el 16 d'abril de 1918, mientres ocupaba la presidencia del Atenéu.